حبيبي

حبيبي

بقلم شريف محمد شحاتة مصر

أنا لما أوصف حالي هو يقولي أنا مالي

أصل حبيبي أناني عايز بس حناني

وما بتشغله أحوالي كل ما أوصف حالي

أي أمور تشغلني يصرف نظره عنها

يسكت ما يكلمني في الأزمة وأحزانها

في الفرحة يكون جنبي بمشاعره وكلامه

يشوف الفرحة في قلبي وأنا قاعد قدامه

كأن الفرح دة عادة ليل ونهار في سعادة

لو شاف حزن زيادة يرحل عني ليالي

كل ما أوصف حالي

ياما حاولت أحكيله في مشاكلي وأزماتي

كل ما أبوح وأشكيله من مشكلة بحياتي

يشغل نفسه بحاله يشوف موضوع تاني

همومي ولا علي باله علشان هو أناني

ومهما أشرح وأفسر هو ولا يتأثر

يلوم فيا ويكسر قلبي ويحزن بالي

كل ما أوصف حالي

قلبي كتير صبرني وقالي دة هو حبيبك

أقول طبعه يحيرني يرد يقولي نصيبك

لو قلبه بيهواني كان إحساسه معايا

كان يحزن علشاني كل ما أقوله حكاية

كل دة وإسمه حبيبي يهون ألمي وتعذيبي

رغم القسوة نصيبي وهو القلب الغالي

كل ما أوصف حالي