مقالات الرأي
العالم علي لوح قزاز
بقلم الشاعر والكاتب المسرحى احمد محمد زايد
……
العالم على لوح قزاز
من تحته شغال هزاز
خلاه يلعب ع الحبلين
واتكسر فوقه البرواز
الناس فيه كلها الوان
منها الفاقع والبهتان
والمنفوخ زى البالونه
والمفرقع والصفتان
فيه ناس تايهه عن العناوين
شرق وغرب شمال ويمين
وناس شايله نفوس تماسيح
بس ف صورة بنى ادميين
وكتير ناس داخلين ف طاحونه
ناس فى الطراوه وناس مطحونه
وخلق ماشيه بالريموت
وغيرها بحجاره وكبسونه
وناس شبه وناس فاسوخه
وناس عايشه لكين ممسوخه
ابو جلامبو انا شايف جنبو
ترامبو وابو رجلين مسلوخه
كل الناس مستنظره لو
وعشمهم روقان الجو
لكن الليل بالضلمه بيجى
ومعاه يجى الآه والعو
