بقلم شريف شحاته مصر
كل ما يزعل أقوله سماح بعد الصلح أنام وأرتاح
أفرح لما أشوف البسمة في عينيه في كل صباح
وأغضب لما أشوف أحزانه نفسي يتهني ومرتاح
علي طول أنا أدلع فيه أحزن قوي لو فاتني وراح
كل ما يزعل أقوله سماح
لو أغنية تعشقها ودانه أسهر أغني أقولها علشانه
يفرح قوي ويقولها معايا وأنا أعيد وأغنيها تاني
أما في زعله عيني عليا أفضل أصالحه كل شوية
هو ما يرضي كدة بسهولة واجب زعله يأثر فيا
لازم دمعة تبان في عينيا والحزن في وشي يكون وضاح وكل ما يزعل أقوله سماح
أصل حبيبي كتير حساس يسمع قوي لكلام الناس
دايما يسمع أي نميمة يحزن قلبه بلا أي أساس
أبدأ أحايل فيه وأصالحه وأزيل كل همومه وجرحه لما أشوف ضحكته أو فرحه
أرتاح وأبدأ تاني كفاح وكل ما يزعل أقوله سماح
بقلم شريف محمد شحاتة مصر
