تخدير الأطفال.. رحلة “نومة بطل” بسلام وأمان
بقلم أخصائي التخدير والانعاش: أحمد إسماعيل علي
أصعب لحظة على أي أم أو أب هي لما يتركوا طفلهم على باب غرفة العمليات. الخوف بكون مش بس من العملية، بل من((البنج)) وعشان نطمنكم، تخدير الأطفال اليوم صار علم دقيق جداً وفيه ((((حنّية)))) بتخلي الطفل يحس إنه في رحلة مش في مستشفى.
1. ***ليش صايم يا حبيبي***
أهم خطوة بتبدأ من البيت هي الصيام. بنعرف إنه الطفل بيبكي وجوعان، بس صيام الساعات المطلوبة (سواء حليب أو أكل) هو (درع الحماية)عشان نضمن إنه المعدة فاضية تماماً وما يصير أي ارتجاع وقت التخدير. صبّرك عليه في البيت هو أول خطوة لسلامته.
2. ***التخدير بالبالون مش بالإبرة ***
كتير أطفال بيخافوا من الإبر. لهيك، في أغلب الحالات، بنبدأ التخدير عن طريق “ماسك” (كمامة) فيها ريحة حلوة (زي الفواكه)، وبنطلب من الطفل “ينفخ البالونة”. خلال ثواني بكون نام بسلام وبدون ما يحس بوجعة إبرة.
3.*** الحسابات بالـ ميلي غرام***
تخدير الطفل مش نسخة مصغرة من تخدير الكبار. إحنا بنحسب كل جرعة بناءً على وزن الطفل وعمره بالضبط. أجهزة المراقبة عنا حساسة جداً وبتعطينا قراءة لكل نفس وكل نبضة لطفلك وكأننا بنسمع دقات قلبه بإذننا
4.**** ماما وبابا أول وجه بيشوفه**** 👨👩👦
أكبر همنا إنه الطفل ما يصحى خايف. لهيك بنستخدم أدوية بتخلي (الصحوة) تدريجية وهادية. وبمجرد ما يبدأ يستعيد وعيه، بنكون مجهزين إنه يشوف أهله جنبه فوراً، لأن وجودكم هو أحسن #مسكن ألم#نفسي له.
5. أدوية الألم.. وقاية قبل الوجع 💊
إحنا ما بنستنى الطفل يصحى ويحكي ( آي. )بنعطي مسكنات ألم وسوائل خلال العملية، عشان لما يصحى يكون مرتاح ويقدر يشرب ويرجع لطبيعته بسرعة
: نصائح ذهبية لكل أم وأب قبل #تخدير البطل#
عشان تمر رحلة التخدير بسلام وهدوء، في أشياء بسيطة بس مفعولها سحر، لازم تنتبهوا لها:
1. الصدق(أحسن مسكن)
لا تحكوا للطفل ((إحنا رايحين مشوار)) أو ((نشتري لعبة)) وفجأة يلاقي حاله بالمستشفى. اشرحوا له ببساطة:
رح نروّح عند دكتور شاطر يخليك تنام شوي عشان الوجع يروح وتصير بطل”. ///الصدق بيبني ثقة بتريحه وقت البنج///
2. الالتزام بالصيام وهاد خط أحمر 🛑
بنعرف قلبكم بيحرقكم لما يبكي من الجوع، بس حبة بسكويت أو رشفة عصير ((خيانة))لسلامته. التزموا بالوقت اللي حدده دكتور التخدير بالضبط (سواء للأكل أو الحليب أو المي)، لأنه هاد صمام الأمان الوحيد لمجرى التنفس عنده.
3. خبرونا عن (الرشح والحرارة)
إذا طفلك مرشح، بيكح، أو حرارته مرتفعة قبل العملية بيوم، لازم تخبرونا. أحياناً بكون من الأفضل نأجل العملية كم يوم عشان نضمن إنه رئة الطفل وصدره مرتاحين تماماً للتخدير.
4. (اللعبة المفضلة)هي رفيقة الدرب
خلوا طفلك ياخد معاه لعبته اللي بيحبها أو (لحاف) معين بيرتاح فيه لغرفة العمليات (إذا سمح المستشفى). هاد الشي بيعطيه إحساس بالأمان بوسط الأجهزة والدكاترة.
5. كونوا إنتوا (مصدر الهدوء)
الطفل متل الرادار، بيلقط توتركم فوراً. إذا شافكم خايفين بيبكي، وإذا شافكم هاديين بيفوت هو هادي. جربوا تبتسموا وتطمنوه، وإحنا رح نهتم بالباقي.
