زجل
أه ياني
بقلم شريف محمد شحاتة مصر
قسموا شعوبهم إلي شعبين شعب سعيد وشعب يعاني
حتي الشارع بقي شارعين شارع حلو ووحش للتاني
القسمة مش عادلة يا حلوين جيل بيكافح وجيل أناني
هي الدولة كدة بقت إتنين دولة فوق دولة تحت علشاني
شعب قليل عايش في الساحل أغاني وعري كمان رقص
شعب عاري من الراس للكاحل مش فالح غير في الهجس
كل يومين فضايح بجلاجل ما فيه في شعورهم دم وحس
لو تصادفهم يوم وتقابل بتشوف منهم مصايب بس
أما التاني أه يا عيني عليه شايف فقر مع هم وجوع
قرارات زفت بتهدم فيه ينام وسط الهموم موجوع
أزمات مصنوعة فقط ليه علشان يفضل كدة مفجوع
حتي الدمع نشف في عينيه نفسه يعرف إيه الموضوع
عايزين نسأل إيه هو الفرق بينا وبين الناس التانية
حد يقول لنا فين هو الحق روحنا رخيصة روحهم غالية
ولا أبدانهم جميلة وأرق وإحنا فقط أجسادنا الفانية
كل أمالنا لو الأرض تنشق وتبلع فيها الناس العالية أه ياني
بقلم/ شريف محمد شحاتة. مصر
