بقلم اللواء سامى دنيا
أولاً: التحذير من الشائعات واستهداف مصر خدوا بالكم الفتره القادمه الهجوم علي مصر وعلي الرئيس تحديدا وهيتم محاولة ترويج شائعات لشحن نفوس الشارع المصري ضد الدوله والإدارة المصرية …ليييييييييييييه ؟؟ علشان تفاصيل تخص نشر معدات عسكرية مصرية في بعض الدول الخليجية وتم رفض اندماج ومشاركه في اي ضربات عسكرية في المنطقه … وطبعا الرفض بيخلق زعل .. وبيتم استخدام أساليب اخري كوسيلة ضغط !! وده طبعا امر مرفوض … الاول كانوا بيقولوا علي الرئيس انه صهيوني وتبعهم وطبعا كلنا فاكرين الكلام الاهبل ده !! النهارده بقي بيقولوا عليه شيعي 😉 وطبعا في هنلاقي ناس بيصدقوا !! السوال هنا بقي ” يعني هو اسرائيلي ولا شيعي ؟ علشان الواحد احتار يافندم ” خدوا بالكم من اي ترويج شائعات تخص مصر الفتره القادمه 🇪🇬
ثانياً: لبنان بين التاريخ والاستعمار وصراعات النفوذ{{{ يتسائل البعض }}}.
للتوضيح …. لبنان هى ناتج ايضا لاتفاقية سايكوس بيكو وكانت ضمن الاستعمار الفرنسي: زى دول الخليج بالظبط
(( عدا سلطنة عمان )) عشان كتير بيسألوا … ليه لبنان معندهاش جيش وطنى قوى؟؟ ليه لبنان فيها طوائف كتير؟؟
هو الإستعمار القديم/الجديد
اللى محدد ده وبدقه …. ولسه …..ماكرون/فرنسا …. بيعتبرها ميراث الاستعمار الفرنسي(( القديم ))….== ودايما بيدخل فى صدام مع اميركا/إسرائيل (( الاستعمار الجديد )) == كلها صراعات نفوذ بين قوتين
الاستعمار القديم (( الماسونيه )) بريطانيا/فرنسا ….والاستعمار الجديد( الصهيونيه العالميه ) أميركا/إسرائيل كده فهمتوا ليه لبنان معندهاش جيش قوى وليه دول الخليج مقسمه لدويلات صغيره جدا ؟؟
وليه دول الخليج معندهاش جيوش قويه ؟؟ وليه بيدفعوا تريليونات للمستعمرين؟؟؟ وفهمتوا ليه رفضوا اقتراح مصر بإنشاء جيش عربى موحد قوى ؟؟
(( مش هما اللى رفضوا …. اللى رفض المستعمرين فى أوضح من كده شرح ؟؟
ثالثاً: الخليج والقواعد العسكرية الأجنبية…. : ترامب والعلاقات مع الدول العربية ماذا يريد المعلم عِجَّة ترامب سابقاً من العرب ….أكيد فلوس فقط لا غير
وأن ينسب لنفسه إنتصار كاذب وهو بالفعل كذاب والكذب بيجرى فى دمه من الصغر
على مسئوليتى ……..هام…..النهاردة الصبح جميع التقارير. الإستخباراتية: ■توضح ان مطار الكويت إتضرب وإتدمر وفى 63 واحد إتصاب بينهم حالات خطيرة وحالات بتر…. ■== أما القواعد الأمريكية إللى المفروض إنها سبب الأزمة كلها فهى ما زالت سليمة لاقيت نفسى قاعد كأنى مسعود فى فيلم أرض النفاق… بطولة الفنان فؤاد المهندس والفنانة شويكار…قعدت أقرأ بنفسى كل كبيرة وصغيرة: وقعدت افكر عشان أطلع بتقرير مبدئى…عن ما حدث فى مطار الكويت
لقيت_حاجة_غريبة: محدش كان عارف بشكل مؤكد هل الضربة إللى أصابت مطار الكويت النهاردة الصبح دى هى ضربة إيرانية فعلاً، ولا هى عملية تضليل وعَلَم مُزيف من دولة الكيان الصهيونى “إسرائيل”، ولا صاروخ إعتراضى أمريكى سقط على المطار…
كان_فى_إعتقادى_الشخصى إن الضربة دى ليست إيرانية أساساً… لإنها مش فى مصلحة إيران خالص إنها تضرب مكان أو منطقة مدنية، وقُلت فى نفسى لسه الوقت مبكر… وخلال الساعات الجاية هشوف وأتأكد من الكلام ده… زى_ما_توقعت: إيران نفت إنها ضربت أى صواريخ على المطار وقالت إن إللى حصل بسبب خطأ من صاروخ باتريوت دفاع جوى أمريكى هو إللى وقع على المطار!!
لقيت_نفسى_بقول: ليه المأزق دا إللى دول المنطقة حاطة نفسها فيه من سنين طويلة…أمريكا بتقول إن وجودها العسكرى وقواعدها فى الخليج، وشبكة الدفاعات الجوية والبحرية هناك هدفها حماية الحلفاء وضمان الإستقرار… ف فين بقى حماية الحلفاء لَمَّا إنتى يا أمريكا كل قواعدك سليمة والضرر فيها بسيط (أقصد فى ضربة يوم المطار الكويتى الاخيرة وليس الضربات السابقة فى الحرب)، ومفيش ولا جندى أمريكى إتصاب بحسب تصريحات القيادة المركزية الأمريكية CENTCOM …! ليه بيحموا قواعدهم بس، بينما سايبين مطار الكويت يتضرب و 63 مدنى مالهمش علاقة بالصراع أصلًا يتصابوا إصابات خطيرة؟الإجابة: عشان همَّ مش فارق معاهم الخليج أصلًا… بل_بالعكس؛ دول أساساً بيحاولوا يورطوا إيران أكتر فى حرب مباشرة ضد الخليج، وعشان كده بيستخدموا أرضهم فى الهجوم على الإيرانيين، وبعدين يسيبوهم يتحملوا رد الفعل من إيران…
والمشهد_ده_للأسف هيتكرر تانى كتير…
عارف_ليه؟ عشان_ترامب عايز يجبر دول الخليج على الإنضمام للإتفاقيات الإبراهيمية زى ما صرح من كام يوم، ولَمَّا لقاهم رافضين ومعترضين، قرر يِتَّبِع سياسة إستفزاز إيران ودفعها للرد، عشان يوصل رسالة للخليج إن أمنكم القومى هيفضل مهدد طول ما إنتم مش جزء من الإتفاقيات الإبراهيمية…
وهو_ده_المأزق: أى دولة بتسمح بوجود قواعد عسكرية أجنبية على أراضيها، لازم تكون مستعدة إنها تتحمل تبعات أى مواجهة بين الدولة دى وبين خصومها… بس المشكلة إن الثمن فى الغالب مش بيدفعه الجنود ولا القادة العسكريين، بل بيدفعه المواطن العادى إللى بيصحى يلاقى نفسه فجأة فى قلب معركة هو مش طرف فيها من الأساس… وهنا عايز_أأكد_بس_على_حاجة_صغيرة… أى قطرة دم مدنية بتسقط فى الصراعات دى هى جريمة ومأساة لازم يتم إدانتها بغض النظر عن الطرف إللى إتسبب فيها… ولو إيران فعلاً هى إللى ضربت مدنيين بشكل مباشر كده، (وليس الصهاينة أو أمريكا زى ما حصل كتير قبل كده) فأنا أُدِين ده قولاً وفعلاً، حتى لو كان دفاع عن النفس… لكن_فى_نفس_الوقت: إللى حصل ده لازم يخلينا نسأل السؤال الصعب إللى محدش عايز يجاوب عليه…إذا كانت القواعد_الأمريكية موجودة فعلاً عشان حماية المنطقة، ليه كل مرة القواعد دى بتفضل سليمة أو بتتضرر ضرر بسيط، ومفيش جندى أمريكى واحد بيجْرَى له حاجة، وكل الموارد بيتم تسخيرها للدفاع عن القواعد والجنود إللى جواها، بينما الخطر عادى بيوصل للمدن والمنشآت المدنية ومحدش فيهم بيهتم؟
خلاص_بقينا_متعودين_نصحى على خبر ضربة أمريكية، وبعدها ننتظر الرد الإيرانى، وبعدها نستنى نعرف أى مدينة عربية هتدفع الفاتورة المرة دى بسبب سياسة حكامها ودعمهم المُطْلَق لأمريكا وعدم قدرتهم على نَطْق كلمة “لأ”… ودى كارثة كبيرة…
الأمم لَمَّا تتعود على دور المتفرج والمفعول به، بتبقى خسرت أهم حاجة ممكن تمتلكها… قدرتها على التحكم فى مصيرها…
وساعتها هَتُدْرِك متأخر أوى إنها راهنت على الحصان الخطأ .وللحديث بقية…أكيد…..
رابعا: الجيش اللبناني وحزب الله والأزمة الممتدة تعالوا لَمَّا أحكيلكم … عن الكمين إللى إتنصب للجيش اللبنانى… رغم التنبيه عليهم! وده يعنى مش جيش ضخم ويعول عليه زى العراقى أو السورى زمان مثلاً…
لا هو طول عمره كتكوت ضعيف الجناح والدنيا لعبت بيه! بس كان على قد الحياة فى لبنان! لكن هو جيش لدولة تقع فى مرمى أهداف إسرائيل …واخدلى بالك يا صديقى!♦ لَمَّا حصل إجتياح إسرائيل لجنوب لبنان سنة 1982… إللى أشتبك وقتها مكنش حزب الله… ده كانت وحدات من ظباط وجنود الجيش اللبنانى بجد!♦ وعلى الرغم من إنه وقتها كان منهك جداً بسبب خروجه من الحرب الأهلية اللبنانية إللى أشعلتها منظمة التحرير الفلسطينية فى لبنان… ♦ ما هو يا عزيزى… الفصايل الفلسطينية دى سواء فَتْح ولا حماس ولا سخام أزرق عليهم… وظيفتها فى المنطقة إن إسرائيل تقولها أدخل ياض إعملى فرشة فى الحتة الفلانية عشان أحتلها… فيقولها حاضر يا كبير و ينفذ…♦ كان من باب أَوْلَّى إن أشاوس فتح بدل ما يحاربوا الجيش اللبنانى… يحاربوا الجيش إللى محتل أراضيهم…♦ من سنة 1975 لسنة 1981 الجيش اللبنانى بيتفرم فى حرب أهلية… ولَمَّا حصل الإجتياح الإسرائيلى سنة 1982 بقا بيقاوم… مكنش وقتها أصلاً إتعمل حزب الله… ♦ لكن كان فى حركة أمل والجبهة اليسارية وشوية فصايل فلسطينية من مخيمات الجنوب واقفين جنبه… ♦ ووقف الإجتياح عند النبطية…ومحصلش تقدم فى قلعة الشقيف ولا سلسلة الجبال وكان بيقاوم ببسالة…
♦ إيه الحُجَّة بتاعت الإجتياح ده إسرائيل بتلاحق منظمة التحرير دفاعاً عن نفسها ضد الإرهاب…▪ سنة 1983 نجح الجيش إنه يفك الحصار عن بيروت والضاحية “إللى هما متحاصرين إنهاردة”…▪ سنة 1985 فى 8 يناير قدر يجبر جيش الإحتلال للتراجع فى عمق الجنوب عند ما يُسمى الشريط العازل…
▪ هوب يا صديقى نُشأ حزب الله فى 16 فبراير 1985… و تلا السيد إبراهيم أمين “الامين العام: الأول للحزب البيان التأسيسى بعنوان ” رسالة إلى المستضعفين فى العالم… نحن من سيقضى على الصهاينة تصفيق حاد يا جماعة لو سمحتوا!! ▪ إنتوا مش شايفين العنوان بتاع البيان… و بتاع اللبان وإللى مبانش…▪ وقالوا للجيش إتفضل إنت إطلع إرتاح فى الشمال وإحنا هنحرر الجنوب…
▪ يقعدوا قد إيه يا مؤمن بيقاوموا مقاومة شديدة…من سنة 1985 لسنة 1999… لا إسرائيل بتطلع من الجنوب… و لا حزب الله بينتصر…▪ بس هاريين الكوكب بيانات… الجيش اللبنانى قالك لأ… مبدهاش بقا…
▪ بدأت شوية مواجهات عنيفة… لحد ما صدر قرار الكنيست بإنسحاب إسرائيل من الأراضى اللبنانية… سؤال ال home work لحضراتكم… أجب عن الأسئلة التالية :
▪ لماذا تم إنشاء حزب الله؟
▪ من الذى أجبر إسرائيل على الإنسحاب؟
▪ ما هو دور منظمة لامؤاخذة “التحرير… رمسيس…غمرة… عباسية”… فى خراب لبنان…
هنا بقا أتفاجئت الصهيونية بقدرات الجيش اللبنانى… إيه ده… إنت لسه فيك حيل تقاوم…طيب لك حل! إيه بقا الحل: تعالي أقولك الحدوتة… لبنان كانت خلاص إتدمرت مالياً… هتلجأ لمين صندوق النقد… والكلام ده كان فى 2002 …▪ هنا صندوق النقد معندوش إلا روشتة واحدة…
▪ ندمر العُمْلَة… نبيع الأصول… نرفع الدعم ونرفع الشعب بالمرة… ▪ الخلطة_دى لا تُنْجِب إلا الفقر والجوع…▪ ومش بتتم أبداً على إيد حكومة وطنية… صندوق النقد إتطرد من الدول إللى حكوماتها وطنية وطلعوا زى الكلاب الحزينة… زى ماليزيا والبرازيل…
🔹 الجيش_اللبنانى بيتصرف عليه من الموازنة ومن مساعدات من فرنسا… وبيملك حاجة إسمها ” المؤسسة الإقتصادية “…
🔹 إيه_المؤسسة_الإقتصادية_دى مجموعة كيانات صُغَنَّنَة عبارة عن مصنعين أدوية… مزارع… منافذ تموينية… منتجعين سياحيين…
🔹 بيبيعوا منتجات وسلع مخفضة للجنود والمدنيين كمان… وفى نفس الوقت العوائد بتتحط على موازنة تحسين الرواتب و الحوافز لأفراد الجيش… 🔸جه بقا يا صديقى صندوق النقد وإلا نبيع شركات الجيش ” قصدى المؤسسة الإقتصادية ” …🔸زى مسرحية الفنان فؤاد المهندس سُك على بناتك…
“كونتا قاعد هنا”… وكنتى قاعد هنا… والصندوق على نغمة واحدة…نبيعُه يا بابا… نبيعُه يا بابا… نبيعُه يا بابا…🔸 على يَدِّنا كلنا…
🔸 إتباعت الفنادق والنوادى… قصدى المنتجعات السياحية… أنا بقيت بتلخبط يا صديقى…🔸 وبعدها باعوا المصنعين الغذائيين… وإللى بَعْدُه وإللى بَعْدُه…
♦ هوب صحى الجيش لقى نفسه ملط… على الحميد المجيد قالوا ماشى الموازنة تعوضنا… رئيس الحكومة قالهم يعوض عليكم ربنا… أجيبلكم منين… ♦ ده الليرة فضلنا نعوموها لحد ما فقدت 90% من قيمتها… ولَمَّا تفقد 100% لازم هدولر ” يعنى ألغى الليرة وأثَبِّت الدولار گ عملة “… و ده شئ هيرفع التضخم طبعاً… بصوا إحنا داخلين على أيام مهببة…
🔸رد_الجيش طب وسط الغلاء ده والتضخم إزاى هنعيش بنصف راتب!!!🔸 الحكومة تلجأ لمين للصندوق… 🔸 وطبعاً الحل عند الصندوق جاهز و منتظر اللحظة دى!!!
🔸 الحل كان إيه سرحوهم…🔸 وَقَف الترقى لحد رتبة عقيد عميد بالكتير و محدش يبقا اكثر من ذلك… كله يتقاعد والتقاعد بثلث الراتب… ويبقا إنت كده وفرت رواتب…
وإللى عايز يشتغل شغلانة تانية بعد الضهر إدوله الصلاحية بكده… 🔸 ظابط وشغلانة تانية دونت ميكس يا باشا…🔸 كده عدد الجيش بدأ يتقلص… 🔸 بس فى عجز فى الموازنة يا حكومة …🔸 طب نعمل إيه يا صندوق…🔸 بيعوا التسليح الزيادة…
🔸 ده أصلاً سلاح كتير على العدد… و بعدين إنت خايف من إيه… مش إسرائيل إنسحبت وقرار مجلس الأمن 1175 موجود…🔸 هتعمل إيه بالسلاح ده … بيع… بيع…يا عواد… 🔸 بيع السلاح عشان تسدد عجز الموازنة… عشان بيع شركات الجيش مكفاش…🔸 ولو مبيعتش يبقا برنامج الإصلاح بتاعى معاك منتهاش ومفيش شرايح ومش همشي فى أكتوبر 2026
يوه إتلخبطت تانى قصدى يونيو 2006 …
أنا أسف عشان بنسى… هو انا مخى دفتر…
🔸 بيع … بيع عشان ننفذ الأجندة ونخلص منكم بقا!!!🔹ولحد سنة 2006 كان الجيش اللبنانى وصل للحال زى ما إنت شايفُه كده…
🔹 لا منظومة صواريخ .. لا طيران .. لا ردارات…🔹 همَّ كام دبابة عتيقة ومركبات خفيفة وشوية بنادق وحبة ظباط راسمين تاتو على ضهرهم لامؤاخذة…🔹 وطبعا كتير قدم تقاعد وسافر برا لبنان أصلاً وإشتغلوا بادى جاردات فى أوروبا… أسئلة ال home work :▪ أذكر بالدلائل دور صندوق النقد الدولى فى مساعدة إسرائيل على إحتلال الدول؟▪ كيف ساهمت حكومة لبنان فى تدمير جيشها ؟▪ عاوز الكراسات تبقى متسطرة كويس… وإستخدموا الجاف الأزرق والإسود… وأى شطب فى كراسة الواجب هديكم صفر فى أعمال السنة…▪ آسف من سُخرية القَدَر…▪ هَمّ يضحك… وهَمّ يبكى…
▪ بالمناسبة كان لى إخوات من الظباط اللبنانيين رجالة أوى… ▪اللهم إنى أسألك بإسمك الأعظم أن تجمع العرب على كلمة واحدة… تهز أرجاء العالم أجمع…
▪ اللهم إستجب…▪ اللهم آمين يا أرحم الراحمين . الخلاصة الشاملة:
المنطقة تمر بمرحلة شديدة الحساسية والتقلب. الشائعة أصبحت سلاحاً لا يقل خطورة عن الصاروخ. لبنان نموذج لكيفية تداخل السياسة بالتاريخ والاقتصاد والأمن.
الدول الصغيرة غالباً ما تجد نفسها وسط صراعات أكبر منها. المدنيون هم الخاسر الأكبر في كل مواجهة عسكرية.لا بد من التمييز بين الحقائق والتحليلات والآراء الشخصية. قراءة الأحداث بعقل بارد أهم من التفاعل معها بعاطفة ساخنة. الأمن القومي لأي دولة يبدأ من الوعي الشعبي قبل أي شيء آخر. المستقبل في المنطقة سيُحسم بميزان المصالح أكثر من الشعارات.
اخيرا :وسط الضجيج السياسي والإعلامي، تبقى الحقيقة الثابتة أن الأوطان تحتاج إلى وعيٍ ويقظةٍ وتدقيقٍ في المعلومات، لأن أخطر ما يهدد الدول أحياناً ليس ما يأتي من الخارج، بل ما ينجح في اختراق العقول من الداخل……. حفظ الله مصر 🇪🇬 الحبيبة ارض وشعب وجيش وحفظ الله الزعيم السيسى البطل قولوا آمين والحمد لله رب العالمين ……. وإذكروا الله كثيرا لعلكم تفلحون.
