مسرحية
موقعة بلطيم… حين هُزم العالم من شاطئ
كوميديا سياسية ساخرة
تأليف: خالد البنا
الفصل الأول
الصفحة 1
إضاءة عامة – شاطئ بلطيم – عصر مائل للمغرب
لافتة مهلهلة مكتوب عليها:
«المؤتمر الشعبي المصيري العاجل»
وتحتها بخط أصغر:
«الدخول بالمجان – الخروج على مسؤوليتك»
يدخل الأسطى فهيم، يحمل كرسيا بلاستيك ويضعه في مواجهة الجمهور.
الأسطى فهيم:
مساء الخير يا حضرات
إحنا هنا في بلطيم
آخر حدود الخريطة
وأول حدود الحكمة
المكان اللي البحر فيه
أعقل من السياسة
والسمك أفهم من البيانات
النهارده
هنشهد مع بعض
موقعة تاريخية
مش بالسيف
ولا بالمدفع
لكن بالورق…
الورق اللي بيخوف العالم
لما يكون أبيض فاضي
(ضحك)
الصفحة 2
يدخل سيد الورق، شايل ملف ضخم، يتعثر.
سيد الورق:
استنوا… استنوا…
البيانات تقيلة
وأنا لوحدي
عم صابر (قاعد يصلح شبكة):
هو انت شايل دستور ولا فاتورة كهربا؟
سيد الورق:
دي بيانات الحزب
بيانات نارية
عم صابر:
نارية؟
طب قربها من البحر
نشوف هتطفى ولا لأ
(ضحك)
يدخل شوقي شعارات، يلوّح بقبضته في الهواء.
شوقي:
اليوم يوم غضب!
اليوم يوم موقف تاريخي!
أم عطية (تضع براد الشاي):
حد قال يوم سكر؟
ولا لسه؟
الصفحة 3
موسيقى وطنية مبالغ فيها
يدخل المناضل جابر الثوري
يرفع يده ببطء كأنه يوقف الزمن.
جابر الثوري:
أيها الرفاق…
أيها الأحرار…
أيها الواقفون على شاطئ التاريخ!
عم صابر:
واحنا واقفين على شاطئ بلطيم
في فرق؟
جابر:
ما يحدث في العالم
لا يمكن السكوت عنه!
رزق الله (يدفع عربة فريسكا):
طب قبل ما نسكت
حد يشرب؟
الصفحة 4
جابر الثوري:
قوى الاستكبار
تعبث بمصائر الشعوب
والحزب قرر…
أن يقول كلمته!
شوقي شعارات:
الله!
الكلمة سلاح!
عم صابر:
لو الكلمة سلاح
كان القاموس دخل الخدمة العسكرية
(ضحك)
سيد الورق:
جاهزين للبيان رقم واحد؟
الجميع:
جاهزين!
الصفحة 5
سيد الورق يفتح الملف… أوراق تقع.
سيد الورق:
(يقرأ) “تابع الحزب
ببالغ القلق
ما يجري على الساحة الدولية…”
عم صابر:
هو القلق ده
بيتحاسب عليه تموين؟
سيد الورق:
“…ويحذر الحزب
من مغبة الاستمرار
في السياسات العدوانية…”
شوقي:
الله!
قول يا بيان!
أم عطية:
البيان ده
عايز شاي تقيل
علشان يدخل الدماغ
الصفحة 6
يدخل ترامب من الجانب الآخر
لابس كاب، ماسك موبايل.
ترامب:
What is this place?
مساعد (من خلف الستار):
Baltim, sir.
ترامب:
Is it a country?
المساعد:
No
It’s a بيان
ترامب:
A statement?
المساعد:
Yes… angry one.
ترامب:
(يضحك) Put it on the fridge.
(ضحك وتصفيق)
إضاءة خافتة –
✦✦✦
الفصل الثاني
:
الصفحة 7
إضاءة تعود تدريجيًا
الجميع ملتف حول منضدة بلاستيك
الميكروفون يصرّ ويطلع صوت صفارة.
شوقي شعارات:
الميكروفون خربان
دي مؤامرة!
عم صابر:
ولا مؤامرة ولا حاجة
ده ميكروفون شاف بيانات كتير
وتعب
جابر الثوري:
لازم نكمّل
العالم سامعنا
حتى لو إحنا مش سامعين بعض
أم عطية:
العالم لو سامع
كان بعت لنا شاي
(ضحك)
الصفحة 8
سيد الورق:
البيان الثاني جاهز
أشد لهجة
وأقسى ألفاظ
رزق الله:
يعني فيه شتيمة؟
سيد الورق:
لا
لكن فيه
“يدين بأشد العبارات”
عم صابر:
أشد من إيه؟
من “يدين” العادية؟
جابر الثوري:
السياسة درجات
زي الشطة
الصفحة 9
يدخل مراسل أجنبي
شايل كاميرا كبيرة.
المراسل:
Excuse me…
Is this the المعارضة؟
شوقي:
نعم
نحن صوت الشعوب
المراسل:
Which people?
عم صابر:
اللي فاضيين دلوقتي
(ضحك)
المراسل:
What is your demand?
جابر:
نطالب…
بإعادة النظر…
في كل شيء
المراسل:
Everything?
سيد الورق:
حتى النظر نفسه
الصفحة 10
ترامب يعود
واقف بعيد، بيتفرج، بياكل فشار.
ترامب:
They are very serious.
المساعد:
Yes sir
They issued three statements.
ترامب:
Any action?
المساعد:
No
But the words are strong.
ترامب:
Call NATO.
We are in danger.
(ضحك وتصفيق)
الصفحة 11
شوقي شعارات:
لازم نعمل تصعيد
البيانات مش كفاية
عم صابر:
تصعيد إيه؟
نطلع السلم؟
شوقي:
تصعيد سياسي!
أم عطية:
طب والسياسي ده
بياكل إيه؟
جابر:
التاريخ لا يرحم المتخاذلين!
رزق الله:
ولا بياكل الفريسكا
الصفحة 12
سكون مفاجئ
الكل ينظر للبحر
عم صابر:
البحر بيقول إيه؟
سيد الورق:
(ينصت) تقريبا
بيقول
“سيبوني في حالي”
جابر الثوري:
إذن…
نصدر البيان الأخير
النهائي
الحاسم
الذي لا رجعة فيه
الجميع (بحماس):
بيان!!!
إضاءة قوية – ستارة مؤقتة
الفصل الثالث
الصفحة 13
إضاءة خافتة
الميكروفون في المنتصف، وعليه شريط أسود كأنه في عزاء.
عم صابر:
الله يرحمك
كنت بتطلع صفير
بس كنت واقف في وش الطغيان
شوقي شعارات:
لا وقت للعواطف
نحن أمام بيان مصيري
سيد الورق:
البيان ده
هيغيّر ميزان القوى
في البحر المتوسط
أم عطية:
ولا يغيّر اتجاه الريح حتى
(ضحك)
الصفحة 14
جابر الثوري:
اقترح نضيف فقرة
عن الهيمنة الإمبريالية
على الرمل والمياه المالحة
رزق الله:
ونطالب بإعادة توزيع الشمس
بعدالة
سيد الورق:
مهم
الشمس بتيجي على ناس
وتسيب ناس
عم صابر:
أنا الشمس بتيجي لي
وأنا نايم
مش مستفيد حاجة
الصفحة 15
انقسام مفاجئ في الصف
شوقي:
مين مع البيان بصيغته الحالية؟
(نصهم يرفع إيده)
جابر:
مين ضد؟
(النص التاني يرفع إيده)
أم عطية:
طب مين جعان؟
(الجميع يرفع إيده)
عم صابر:
الديمقراطية كده
جميلة
الصفحة 16
يدخل شاب صغير
شايل موبايل.
الشاب:
يا جماعة
الترند راح منكم
شوقي:
إزاي؟
إحنا بنعمل تاريخ!
الشاب:
التاريخ دلوقتي
بيتحسب باللايك
جابر:
وهل يسقط الطغيان باللايك؟
الشاب:
لا
بس بيتشاف
الصفحة 17
ترامب يتقدم خطوة للأمام
ترامب:
I must say…
I feel threatened.
عم صابر:
شايف؟
الرجل خاف
ترامب:
From boredom.
(ضحك عالي)
المساعد:
Sir, should we respond?
ترامب:
No.
Let them issue another statement.
الصفحة 18
سيد الورق:
البيان النهائي
فيه 27 فقرة
و4 ملاحق
وهوامش ثورية
أم عطية:
يعني محدش هيقراه
جابر:
المهم
يُكتب
عم صابر:
والبحر؟
الجميع ينظر للبحر
صوت البحر (خافت):
سيبوني
أنا مالي؟
إظلام تدريجي – ستارة
الفصل الرابع
الصفحة 19: مؤتمر بلا صحافة
منصة خشبية مهزوزة
لا يوجد صحفيون. فقط ميكروفونات.
شوقي شعارات:
نعلن نحن
عن عقد مؤتمر صحفي عالمي
عم صابر:
فين الصحفيين؟
سيد الورق:
اعتذروا
عندهم مؤتمر أهم
عن ارتفاع سعر الطماطم
جابر الثوري:
إذن نخاطب التاريخ مباشرة
أم عطية:
التاريخ ده بييجي الساعة كام؟
الصفحة 20: المواطن اللي مش فاهم حاجة
يدخل رجل بسيط، لابس شبشب، ماسك عيش
المواطن:
هو في إيه؟
(صمت)
شوقي:
نحن نواجه الطغيان العالمي
المواطن:
طب الغاز هيقطع؟
جابر:
نحن نواجه الإمبريالية
المواطن:
طب العيش هيغلى؟
سيد الورق:
أنت خارج السياق الثوري
المواطن:
وأنا داخل السياق المعيشي
(ضحك وتصفيق)
الصفحة 21: انشقاق تاريخي
جابر:
أنا أعلن
تأسيس “تيار بلطيم البحري”
شوقي:
وأنا أرد
بتأسيس “جبهة الرمال الصامدة”
عم صابر:
وأنا أعتزل السياسة
وأشتغل إنقاذ
أم عطية:
وأنا هبيع شاي
للثوار المتعبين
الصفحة 22: بيان يرد على بيان
سيد الورق (يقرأ):
ردًا على البيان السابق
الذي رد على البيان الأسبق
نؤكد رفضنا للرد
على الرد
الذي لم يراعِ الردود السابقة
المواطن:
يعني إيه؟
الجميع:
مش مهم
الصفحة 23: ترامب مرة أخرى
ترامب (يضحك):
They’re still talking?
المساعد:
Yes sir.
They issued a fourth statement.
ترامب:
Impressive stamina.
عم صابر (يصرخ من بعيد):
احنا صامدين!
ترامب:
I can see that…
from very far away.
الصفحة 24: الخلاصة
غروب الشمس
البيانات متراكمة
الميكروفونات صدئة
المواطن:
خلصتوا؟
شوقي:
الثورة مستمرة
المواطن:
وأنا رايح البيت
صوت البحر:
وأنا…
كما كنت
موجة بتيجي
وموجة تمشي
إظلام كامل – ستارة
الفصل الخامس
حين أعلنت بلطيم استقلالها عن المنطق
الصفحة 25
إعلان حالة الطوارئ الفكرية
صافرة إنذار… لا أحد يعرف من أين
شوقي شعارات:
نعلن
حالة الطوارئ الفكرية
ابتداءً من هذه اللحظة
المواطن:
يعني إيه؟
سيد الورق:
يعني التفكير
هيبقى بتصريح
عم صابر:
وأنا تصريح التفكير بتاعي خلص امبارح
الصفحة 26: تشكيل الحكومة الثورية
جابر الثوري:
نشكّل حكومة إنقاذ بلطيمية
شوقي:
أنا رئيس المجلس الأعلى
للمجلس الأدنى
للشعارات الكبرى
سيد الورق:
وأنا وزير البيانات
والبيانات المضادة
والبيانات التي لم تُقرأ
أم عطية:
وأنا وزيرة التموين
(شاي وقهوة)
المواطن:
وأنا؟
الجميع:
الشعب
المواطن:
لا مؤاخذة… أنا مستعجل
الصفحة 27: أول قرار جمهوري
شوقي (بحماسة):
نصدر قرارًا تاريخيًا
بقطع العلاقات
مع الواقع
جابر:
وتجميد التعامل
مع المنطق
عم صابر:
وإلغاء البحر
لأنه محايد
صوت البحر (غاضب):
أنا؟ محايد؟
ده أنا غريق من زمان!
الصفحة 28: تدخل خارجي غير متوقع
يدخل رجل أجنبي… لابس شورت وسائح
السائح:
Excuse me…
is this a festival?
شوقي:
لا
هذه معركة مصيرية
السائح:
Nice…
Where can I take photos?
سيد الورق:
ممنوع التصوير
إلا للمعاناة
السائح:
Then I’ll go swim.
(يخرج بلا اكتراث)
جابر:
العالم لا يشعر بنا!
المواطن:
ولا إحنا حاسين بنفسنا
الصفحة 29: ترامب للمرة الأخيرة
ترامب (على شاشة كبيرة):
Guys…
I really didn’t do anything.
شوقي:
كذّاب!
ترامب:
I don’t even know where Baltim is.
عم صابر:
دي مصيبة أكبر
ترامب:
But good luck.
(الشاشة تنطفئ)
صمت ثقيل
المواطن:
يعني كل ده…
من غير خصم؟
الصفحة 30: الانفجار العظيم
الكل يتكلم في نفس اللحظة
بيانات!
شعارات!
هتافات!
تكبير!
تصفيق!
لا أحد يفهم أحدًا
فجأة… أم عطية تصرخ
أم عطية:
الشاي خلص!
صمت مرعب
شوقي (منهار):
الثورة بدون شاي…
لا تكتمل
جابر:
إذن نعلّق النضال
حتى إشعار آخر
المواطن:
حمد لله
الخاتمة الكبرى (قصيرة تصفق لها القاعة)
صوت الراوي:
وهكذا
انتهت موقعة بلطيم
لا بنصر
ولا بهزيمة
بل
بانصراف الجميع
كلٌ إلى بيته
إلا البيانات
ظلّت
تبحث عن قارئ
تصفيق – ستارة
🎭 نهاية المسرحية
