خاين العشرة
تحرير : أيمن بحر
نواياك الخبيثة كلها
ظهرت وبانت
نسيت الصحبة اللي
بالود مني كانت
عِشرة العمر الطويلة
عليك هانت
واللقمة اللي قسمناها
ما بينا اتخانت
…
سنين وأتاريني كنت
فيك مخدوع
بسبب غدرك وخيانتك
بقيت ملدوع
الأساس اللي بنيته
خليته مصدوع
والعهود اللي حلفت بيها
مش اتصانت
…
كنت ماشي معاك
بحسن نية
ما شوفتش مني غير
الود والحنية
انت اللي عشقت طبع
الخسة والدونية
والأطماع الردية في
عيونك زانت
…
استغليت إخلاصي
معاك وطيبتي
ما راعيتش لكرامتي
ولا صنت هيبتي
خسارتي فيك كانت
أكبر مصيبتي
الصحبة اللي طالت
بندالتك اتشانت
…
ضاع فيك كل تعبي
لما بان أصلك
سنين طويلة وأنا
شغال في وصلك
ما تمرش فيك يبقى
تستحق فصلك
لحظة نزعك من قلبي
قربت وحانت
…
عشرتنا تاني مستحيل
حترجع زي زمان
اللي خان مرة يخون
كمان وكمان
اللي زيك ما لهوش
تاني أمان
إزاي تروق النفوس
ومن الغل عانت
…
بس افتكر انت اللي
بالعشرة ضحيت
وعن أصول الرجولة
بعدت واتنحيت
خلاص اتشلت ومن
ذكرياتي اتمحيت
وسبل الوصال بينا
دابت ولانت
…
رغم زعلي لكن عرفت
خداعك وغشك
خنت الصاحب اللي
كان وكرك وعشك
غور مش عاوز أشوف
تاني وشك
كنت سندك محدش يقدر
ولا بالمية يرشك
اسأل نفسك ليه بعد ما
فضحتها اتهانت
…
رد المعروف ليا كان
حقدك وغدرك
عضيت الإيد اللي كانت
بخيرها تبادرك
أهيك عرفت من بعدي
قيمتك وقدرك
واكتشفت السواد اللي
شايله فى صدرك
لما قطعت الحبال اللي
إيدك بيها استعانت
…
الود اللي قطعته مش
حيرجع تاني
بعد اللي عملته خلاص
تبعد وتنساني
وتنسى تاني تشوف
معروفي وإحساني
إزاي أسامح اللي أكل
خيري وأذاني
بدعي عليك فى صلاتي
ساجد وقانت
…
رمضان الشيخي من
ديوان ( كدابين الزفة )
