احذر عديم الدين بقلم الدكتور: رمضان السيخى

احذر عديم الدين بقلم الدكتور رمضان السيخى

تحرير: أيمن بحر
…
ما تخافش من اللي خاف من ربه
عنديه تقوى وايمان ومصفي قلبه
بيعرف الأصول والإحترام شاربه
وعمره ما عاب حد ولا عمره سبه
…
خاف من اللي لدينه وشرعه فاقد
قلبه مليان غل وحسد للكل حاقد
بأذية الخلايق شادد همته وعاقد
ما فيش حد اتعامل معاه قام حبه
…
اللي بيعرف ربه ما لهوش في الغل
ولا يعرف يمكر ولا بيحاول يستغل
واكل لقمته بحلال علشانها بيشتغل
ما يشتكيش لحد حتى لو زاد كربه
…
تآمن للي بربه آمن وأخلاقه سليمة
عايش بالأصول ومشيته مستقيمة
لا يغتاب الناس ولا يمشي بالنميمة
ولا عمر حد فى سكك الحرام طبه
…
اللي ما عندهوش دين تخاف منيه
حشري وداخل فى اللي مش يعنيه
إياك تقرب ناحيته ولا تاجي جنبيه
حتشوف ضر وأذى لو جيت جنبه
…
عديم النخوة شخص تافه وبقف
فالت عياره وما عندهوش سقف
لا يفهم فى أصول ابتدا ولا وقف
همه كيف يخربش ويكبر مخالبه
…
عايش على السفلقة وأكل الحرام
لا بيعرف تقاليد ولا يفهم احترام
تلاقيه بيعشق البلطجة والاجرام
يتحمق لو حد ليه فلوس وطالبه
…
قليل الدين شخص عنديه نقص
عايش حياته بالتطبيل والرقص
بيحب مشية العوجان والهجص
وبيكره الحق وبيعاديه ويحاربه
…
اللي ما عرفش ربه ولا أدب شاف
وعاش على قلة الأدب والاسفاف
هو ده اللي منيه تحترس وتخاف
فى بعدك عنه حتكون بس غالبه
…
قليل الدين مهما غديته وعشيته
مهما صاحبته وعاشرته وماشيته
ومهما صادقته بود ومش غشيته
يخون العشرة وودك يقوم ضاربه
…
لا تناقش قليل الدين ولا تحاوره
ولا تزامله ولا تمالحه ولا تجاوره
لا تعامله ولا تناصحه ولا تشاوره
ما تعاشرهوش وابتعد عند دربه
…
اللي بعيد عن ربه ما لهوش أمان
طول ما تعاشره حتفضل غرمان
مهما تعمل معاه حيخليك ندمان
احذر عديم الدين واتجنب قربه
…