دُنْيا الشَّقلوب.بقلم منى محمد

دُنْيا الشَّقلوب

تحرير:أيمن بحر
دُنْيا أفراح وأحزان… أهي بتعدّي
طاحونة شغّالة دوّامة… ما بتهدّي
أفراحنا يومين… وحزننا سنين
وقلوبنا مليانة شوق… وأنين وحنين

الكل في دوشة… ولا حدّ بيسمع
وناس عايشة زيف… ولسّه بتطمع
تجمع ملايين… ولا يوم بتشبع
وناس تعِبّي كروش… وناس بتسرق

الحال معوّج… واهو ماشي بالشقلوب
والأم عَ النت… عايشة حال مقلوب
والأب في لقمة عيشه… رايح وتعبان
يرجع يلاقي البيت… محتاج له أمان

جرائم كترت… حاجات ما كناش نعرفها
وناس تنتحر لايف… والناس تتفرّج عليها
إيه البوظان ده يا أبو عَمّة؟
كله عَ الفيس… واخد عقله وهمّه

إيه الأسعار؟! والغلا… يا ناس كفاية
فين التفاح أبو علامة… يا دنيا القساية؟
دُنْيا الشقلوب… بتصدّق كل كدّاب
وفيها الأعداء… بقوا يومًا أحباب

إمتى يا دنيا… يبقى فيكي أمان؟
وتنصفي إنسان… عاش عمره حرمان
إمتى يهدى القلب… ويرتاح من العذاب؟
ونشوف بكره أجمل… من غير خوف ولا اكتئاب